Kua waitohungia e Vodafone Aotearoa me Te Rūnanga o Ngāi Tahu tētahi whakaaetanga rautaki e mahi ngātahi ai rāua, otirā, e aro ai te iwi me te whakahaere ratonga matihiko ki tētahi hōtaka mahi, ko ngā whāinga taurua kia nui ake ngā hononga matihiko i roto i te iwi, kia whakapakari anō i te taha ki te kanorau i te rāngai hangarau.

Ko tā tēnei pātuitanga he whakapakari ake i te hononga pātata, mauroa anō hoki i waenga i a Vodafone me Te Rūnanga o Ngāi Tahu, otirā, i tā Vodafone rautaki whanaketanga Māori, i a Whārikihia, e whai nei ki te whakatakoto i te tūāpapa puta noa i te whakahaere kia renarena ake ai te taukaea ki Aotearoa.

Ko tā te tumu whakarae o Vodafone Aotearoa, ko tā Jason Paris, e whai ana te whakaaetanga i tā Vodafone whakaū i ana herenga ki Te Tiriti o Waitangi, he mea whakapaoho i te Hūrae, otirā, māna e whai hua ai ngā taha e rua.

Hei tāna, “Ko ēnei whakahaere e rua e ngākau whakaute ana, otirā, e awhero nui ana kia hua mai he Aotearoa e whai hua ake ana ki ngā whakareanga e pihi mai ana.”

“Mā roto mai i tēnei pātuitanga, e oati nei a Vodafone me Ngāi Tahu ki te para i tētahi huarahi toitū ki te whakahaere kaupapa e whai hua ai, kaua ko ngā whakahaere e rua anake, engari ko te tokomaha e noho ana ki Te Waipounamu. Ehara i te mea ko ngā hua ā-hangarau anake ka whai wāhi ki ēnei kaupapa, engari ka puta hoki he ara whai mahi, ka kaha ake te torohia o te ao matihiko, tae atu ki ngā kaupapa e hua ake ai he kōwhiringa huanui mā te rangatahi i te takiwā o Ngāi Tahu.”

E whai wāhi nui atu ana ki te angitu o te pātuitanga ko te whakaritenga mai o tētahi pae urungi ka arahina ngātahitia, ko ngā pou whakahaere o Vodafone me Ngāi Tahu ka uru atu, ko tā rātou he ārahi i te taha ki te kōkiritanga o te hōtaka mahi ā-tau, e whakatinanahia ai te whakaaetanga mahi ngātahi.

Ko tā te tumu whakarae o Te Rūnanga o Ngāi Tahu, ko tā Arihia Bennett, e kaikā ana a Ngāi Tahu ki te whakapakari i tana whanaungatanga ki a Vodafone.

Ko tāna, “I tēnei tau, kua tino kitea me whanake ā mātou hanganga matihiko i Te Waipounamu, e kore ai te iwi e mahue i te whārua matihiko.”

“E kaikā ana a Ngāi Tahu ki te whakapakari i tēnei pātuitanga mā te tautohu, mā te whakatewhatewha hoki i ngā kaupapa motuhake, i ngā kaupapa nui, e taea ai he momo wānanga, he mahi ngātahi anō kia whai hua ai ngā taha e rua. E whai ana te whakaaetanga kia ngākau titikaha ai ki tētahi tirohanga ngātahi e pai ake ai ngā hua ka puta ki ngā whānau puta noa i Aotearoa, e parahia anō ai tētahi huarahi whakauruuru ki tētahi anamata matihiko, ki tētahi anamata pūkenga rau ā-hangarau nei, mō ā tātou tamariki, otirā, mō ngā whakareanga ka whai ake. Mō tātou, ā, mō kā uri ā muri ake nei.”